Grikkir uppfylla skilyrði ESB og AGS

Grikkir hafa nú uppfyllt öll skilyrði til að fá aðra útborgun af 110 milljarða evra lánapakka frá Evrópusambandinu og Alþjóðagjaldeyrissjóðnum, eftir að hafa náð miklum árangri í endurgerð fjárhagsáætlunar landsins. Þetta segir í tilkynningu frá framkvæmdastjórn Evrópusambandsins.

Lánaáætlun ESB og AGS var ákveðin í maí síðastliðnum og nær til næstu þriggja ára. Grikkir voru á móti krafðir um gríðarlegan niðurskurð til að rétta af skuldahallann. Um 20 milljarðar evra voru greiddir út í fyrstu afborgun en næsta greiðsla nemur um 9 milljörðum og er búist við því að fjármálaráðherrar á evrusvæðinu samþykki útborgun hennar á fundi þann 7. september næstkomandi, að sögn framkvæmdastjórnarinnar.

Olli Rehn, sem fer með efnahagsmál í framkvæmdastjórn ESB, segir að Grikkir hafi náð aðdáunarverðrum árangri við að þétta fjárhaginn á fyrri hluta árs 2010. Engu að síður bíði þeirra enn miklar áskoranir.

• 1 blogg um fréttina

Bloggað um fréttina

• Axel Jóhann Hallgrímsson: Ég er pínulítill Grikki í mér