Borholunni lokað

Bandarískir embættismenn hafa greint frá því að það hafi endanlega tekist að loka borholu BP á botni Mexíkóflóa, fimm mánuðum eftir að olía fór að lek í kjölfar þess að olíuborpallur sprakk og sökk.

Olíufyrirtækið BP dældi steypu í holuna og er nú kominn tappi sem á að halda til frambúðar.

Umhverfisslysið er eitt það versta í sögu Bandaríkjanna. Lekinn hófst 20. apríl sl. þegar olíuborpallurinn Deepwater Horizon sprakk og sökk með þeim afleiðingum að 11 verkamenn létust.

Þann 15. júlí sl. var sett lok á holuna sem dró mjög úr lekanum en stöðvaði hann ekki. Nú hefur lekinn hins vegar verið stöðvaður.