Erlent | AFP | 15.11.2010 | 17:16

Blaðamaður dæmdur til hýðingar

Abdullah konungur er hvattur til að fella niður dóminn yfir blaðamanninum.

Blaðamaður í Sádí-Arabíu var á dögunum dæmdur til að vera hýddur á almannafæri auk þess að hljóta fangelsisdóm fyrir að segja frá mótmælum gegn rafmagnsskorti í landinu. Mannréttindasamtök fordæma úrskurðinn og hvetja stjórnvöld í landinu til að náða manninn.

Mannréttindasamtökin Human Rights Watch segja að blaðamaðurinn, Fahd al-Jukhaidib, sem vinnur fyrir blaðið Al-Jazira, hafi verið dæmdur til að vera hýddur fimmtíu sinnum auk tveggja mánaða fangelsisvistar. Þar af skuli hann vera hýddur 25 sinnum á almannafæri. Það var dómstóll í borginni Qubba í norðurhluta landsins sem komst að þessari niðurstöðu.

Í greininni sem al-Jukhaidib var dæmdur fyrir lýsti hann vandamálum borgarbúa í Qubba vegna tíðs rafmagnsleysis. Birtist greinin þann 7. september árið 2008 að sögn samtakanna.

Al-Jukhaidib, sem einnig er skólastjóri menntaskóla fyrir drengi, var í kjölfarið ákærður fyrir að hvetja til mótmæla fyrir framan orkufyrirtækið. Gengur hann laus enn um sinn á meðan hann áfrýjar dómnum.

„Abdullah konungur hefur hvatt þegna sína til þess að viðra óánægju sína sem byggist á rökum en svo virðist sem þeir sem það geri geti átt von á hýðingu á almannafæri og fangelsisvist,“ sagði Christoph Wilcke, yfirmaður málefna Miðausturlanda hjá Human Rights Watch.

„Fundar- og tjáningarfrelsið eru grundvallaratriði í opnu og ábyrgu samfélagi en það er lítið framboð af því í eins afturhaldssömu landi og Sádí-Arabíu,“ bætti hann við.

Dómstólar í landinu byggja dóma sína á hinum ströngu sjaríalögum en Al-Jukhaidib er ekki fyrsti blaðamaðurinn sem dæmdur er til hýðingar þar.

Í fyrra dæmdi dómstóll í borginni Jeddah blaðakonuna Rozana al-Yami til að vera hýdd sextíu sinnum fyrir að vinna fyrir líbanska sjónvarpsstöð sem sýndi þátt með kynlífsjátningum.

Konungur landsins fyrirskipaði síðar að refsing hennar skildi felld niður.