Hundruð Skota sátu fastir í alla nótt

Hundruð ökumanna sátu fastir í bifreiðum sínum í Skotlandi í nótt vegna fannfergis. Allir helstu þjóðvegir Skotlands lokuðust seint í gærkvöldi vegna snjókomu og neyddust bílstjórar og farþegar í rúmlega fimm hundruð bifreiðum að eyða nóttinni í ökutækjum sínum.

Skoska heimastjórnin boðaði til skyndifundar í nótt þar sem ástandið var rætt og lögregla barðist við að ná til fólks sem skalf úr kulda í bílum sínum. Samkvæmt upplýsingum frá skoskum yfirvöldum hefur ekki snjóað jafn mikið þar síðan á sjöunda áratug síðustu aldar.

Um 150 nemendur og kennarar og foreldrar eyddu nóttinni í skólanum í Hamilton í mið-Skotlandi þar sem ekki þótti óhætt fyrir fólkið að keyra heim vegna mikillar snjókomu. 

Flugvöllunum í Edinborg og Glasgow var lokað tímabundið vegna snjókomunnar en búið er að opna þá á ný. 

Í Skotlandi í gær Reuters

• 1 blogg um fréttina

Bloggað um fréttina

• Gísli Foster Hjartarson: Að láta taka sig í bólinu