Bretar vilja ekki láta Assange lausan

Breska saksóknaraembættið berst gegn því að Julian Assange, stofnandi WikiLeaks verði látinn laus úr haldi. Þetta kemur fram í frétt Sky sjónvarpsstöðvarinnar. En hingað til hefur því verið haldið fram að það séu sænskir saksóknarar sem ekki vilji að hann verði látinn laus gegn tryggingu.

Mál Assange er nú fyrir dómara í Lundúnum en í fyrradag samþykkti breskur dómari að Assange yrði látinn laus gegn tryggingu, sem nemur 240.000 pundum, 43 milljónum króna. Dómarinn setti  það skilyrði að Assange yrði undir eftirliti og afhenti lögreglunni vegabréf sitt.

Sænsk yfirvöld vilja ræða við Assange í tengslum við kynferðisglæpi sem hann er bendlaður við er hann var í Stokkhólmi í ágúst.

Talskona sænska ríkissaksóknaraembættisins segir í samtali við Sky að ákvörðun um áfrýjun hafi alfarið verið ákvörðun breskra yfirvalda. Sænsk yfirvöld hafi ekkert haft með málið að gera.