Henti sér niður í þingsalinn

Maður slasaðist alvarlega eftir að hann henti sér niður af svölum í rúmenska þinginu. Hann var að mótmæla niðurskurði í ríkisútgjöldum.

Atburðurinn átti sér stað þegar þingmenn voru að búa sig undir að greiða atkvæði. Maðurinn starfar við ríkissjónvarpið í Rúmeníu. Hann steig upp á handrið á svölunum og henti sér síðan niður. Fallið var um sjö metrar. Hann er alvarlega slasaður, en ekki í lífshættu.

Emil Boc, forsætisráðherra Rúmeníu, var í ræðustól þegar maðurinn lét sig falla. Hann flýtir sér að huga að manninum ásamt fleiri þingmönnum.

Maðurinn, sem er tveggja barna faðir, var í bol með áletruninni: „Þið vegið að framtíð barna okkar. Þið seljið okkur“.

Þingfundi var frestað í um klukkustund, en hélt síðan áfram. Ríkisstjórnarflokkanir höfðu sigur í atkvæðagreiðslunni eftir að stjórnarandstaðan gekk af fundi.

Landsframleiðsla í Rúmeníu dróst saman um 7% í fyrra og neyddust stjórnvöld til að óska eftir aðstoð Alþjóðagjaldeyrissjóðsins og grípa til harðra aðgerða í ríkisfjármálum.

Maðurinn lætur sig falla.

• 1 blogg um fréttina

Bloggað um fréttina

• Sigurður Haraldsson: Ekki réttlæti!