Erlent | mbl | 3.1.2011 | 18:19

Gáfaðast um sextugt

Samkvæmt rannsókninni ætti Bill Clinton, sem er 64 ára, að vera með hærri tilfinningagreind í dag en þegar hann var forseti á tíunda áratug síðustu aldar. Reuters

Tilfinningagreind fólks nær hámarki um sextugt sem aftur er talið skýra hvers vegna fólk á þeim aldri er næmara en yngra fólk. Þetta kemur fram í nýrri bandarískri rannsókn en hún byggði á tilraun með 144 þátttakendum á nokkrum æviskeiðum.

Robert Levenson, sálfræðingur við Kaliforníu-háskóla í Berkeley og einn aðstandenda tilraunarinnar, skýrir niðurstöðuna í ljósi þróunar.

„Þróunin virðist hafa stillt taugakerfi okkar á þann veg að það nær hámarki hvað snertir samskipti og samúðarríka framkomu eftir því sem við eldumst.“

Niðurstöðurnar eru birtar í fræðiritinu Psychology and Ageing, en þær þykja einnig sýna að eldra fólk eigi auðveldara með að sjá neikvæða hluti í jákvæðu ljósi en þeir sem yngri eru.