Ættingjar Ben Alis handteknir

Ríkissjónvarpið í Túnis sagði í morgun að 33 ættingjar Zine al-Abidine Ben Ali, fyrrverandi forseta landsins, hefðu verið handteknir þegar þeir ætluðu að fara úr landi. 

Sjónvarpið sýndi myndir af úrum, skartgripum og alþjóðlegum kreditkortum sem lagt var hald á í húsleitum hjá ættingum forsetans. Sjálfur flúði Ben Ali land sl. föstudag. 

Rannsókn hófst á því í gær hvort Ben Ali og fjölskylda hans hefðu stolið ríkiseigum. 

Fouad Mebazaa, sem gegnir forsetaembætti í Túnis til bráðabirgða, flutti sjónvarpsávarp í gærkvöldi og hét því að teknir yrðu upp nýir stjórnarhættir, dómskerfið yrði sjálfstætt og takmarkanir á frelsi fjölmiðla afnumdar.

Ný ríkisstjórn, sem tók við í vikunni, tilkynnti jafnframt að allir pólitískir fangar hefðu verið látnir lausir.  

• 1 blogg um fréttina

Bloggað um fréttina

• Jón Snæbjörnsson: Bara alveg eins og hér á íslandi ..............