Erlent | AFP | 27.1.2011 | 8:33

Mótmæli aukast í Egyptalandi

Að minnsta kosti eitt þúsund manns hafa verið handteknir í mótmælunum í Egyptalandi undanfarna tvo daga. Sex hafa látist.

Þetta eru mestu mótmæli í landinu í þrjá áratugi, en þau beinast gegn forseta landsins, Hosni Mubarak.

Félagar í ungliðahreyfingunni 6. apríl hvetja nú til fjöldamótmæla eftir að föstudagsbænum múslíma lýkur á morgun. „Það verður ekkert frí frá mótmælunum í dag. Aðgerðir á götum úti munu halda áfram. Við krefjumst frelsis og virðingar og munum halda áfram þar til kröfum egypsku þjóðarinnar hefur verið mætt,“ segir á Facebook-síðu samtakanna.

Mótmæli héldu áfram fram eftir nóttu í höfuðborg landsins, Kaíró.Þeim lauk þegar lögregla varpaði táragassprengjum og handtók nokkra mótmælendur. Til nokkurra átaka kom á milli lögreglu og mótmælenda, þegar mótmælendur hugðust brjóta sér leið að ráðuneytum landsins.

Í hafnarborginni Suez var sprengjum, svokölluðum mólótovkokkteilum, varpað að opinberum byggingum í gær og höfuðstöðvar stjórnarflokksins voru teknar yfir.

Tugir manna voru handteknir í Alexandríu, næst stærstu borg Egyptalands, fyrir mótmæli.

Yfirvöld bönnuðu mótmæli í gær.

Meðal þess sem mótmælendur krefjast er að innanríkisráðherra landsins víki, en öryggissveitir undir hans stjórn hafa verið ásakaðar um að beita harðræði, hækkun lágmarkslauna og aðgerðir til að lækka matvælaverð.