Handteknir fyrir að hýða stúlku til dauða

Fjórir voru handteknir í Bangladesh grunaðir um að hafa hýtt unga stúlku til dauða. Á meðal þeirra grunuðu er íslamskur klerkur. Verið var að refsa hinni 14 ára gömlu Mosammet Hena fyrir að hafa átt í ástarsambandi við giftan mann. Refsing hennar var 100 högg með bambusstaf. Stúlkan sagði manninn, sem er frændi hennar, hafa nauðgað sér.

Hena hné niður eftir 70 högg og var hún flutt á sjúkrahús þar sem hún lést stuttu síðar. Hún var hýdd á almannafæri í Shariatpur-héraði, 35 kílómetra frá höfuðborginni Dhaka. Lögregla segir refsingar á borð við þessa algengar á afskekktum svæðum í landinu. 40 ára gamall maður sem grunaður er um að hafa tekið þátt í að framfylgja refsingunni er á flótta undan lögreglu.

• 2 blogg um fréttina

Bloggað um fréttina

• Auður Matthíasdóttir: Hryllingur - 100 högg með bambusstaf
• Sigurður Haraldsson: Aftaka!