Erlent | mbl | 6.2.2011 | 9:46

Kína nýtur aukinna vinsælda meðal ferðamanna

Sífellt fleiri ferðamenn sækja Kínverja heim með hverju árinu sem líður. Kína hefur tekið fram úr Spáni og eru nú í þriðja sæti yfir þau lönd sem eru vinsælust á meðal ferðamanna. Frakkland trónir á toppnum og Bandaríkin koma næst á eftir.

Skoðanir ferðamanna á Kína eru skiptar, en flestir virðast vera sammála um að landið sé einstakt í heiminum.

Kanadískur ferðamaður segir í samtali við Reuters að Kínverjar séu mjög vingjarnlegir og það hafi komið sér ánægjulega á óvart. „Ég átti í vandræðum með að kaupa lestarmiða, því ég tala nánast enga kínversku. Þá kom einhver náungi og keypti miða handa mér og afhenti mér hann.“

Austurrískur ferðamaður segir að Kínverjar horfi ekki á annað fólk og að þeir hlægi aldrei. „Þú sérð aldrei bros, þeir eru bara að flýta sér. Þetta er öðruvísi. Þið verðið að sjá þetta sjálf,“ segir hann.

Kínversk stjórnvöld hyggjast auglýsa landið í nýju myndskeiði sem verður sýnt í kínverskum sendiráðum og ræðismannsskrifstofum um allan heim.

„Alþjóðafjármálakreppan, veiking evrunnar og styrking júansins hafa haft áhrif á ferðamannamarkaðinn. En þar sem við erum ferðamannastaður sem hópar heimsækja, og Sameinuðu þjóðirnar segja að Kína verði vinsælasti ferðamannalandið í heiminum, þá teljum við að mikið verði að gera í ferðaþjónustu. Við erum sannfærð um að markaðurinn muni stækka hratt á hverju ári,“ segir Julia Zhao, aðstoðarframkvæmdastjóri Inbound E-Travel.