Neyðarlögum verði aflétt þegar í stað

Bandaríkjastjórn hefur hvatt ríkisstjórn Egyptalands til að aflétta þegar í stað neyðarlögunum sem hafa verið í gildi í landinu í þrjá áratugi. Greint er frá þessu á vef breska ríkisútvarpsins.

Þá hefur Robert Gibbs, talsmaður Bandaríkjaforseta, gagnrýnt ummæli Omar Suleimans, varaforseta landsins, um að Egyptaland sé ekki búið undir lýðræði. Bandarísk stjórnvöld segja lítið gagn í ummælum sem þessum.  Suleiman hefur sagt að sú hætta sé fyrir hendi að tilraun verði gerð til valdaráns takist mönnum ekki að koma á lýðræðisumbótum.

Gibbs sagði ennfremur að ummælin stönguðust á við hugmyndir manna um gerð tímaáætlunar varðandi valdaskiptin.

Joe Biden, varaforseti Bandaríkjanna, hvetur stjórnvöld í Egyptalandi til að hefja þegar í stað ferli sem muni leiða til valdaskipta, og að tekið verði tillit til krafna almennings. 

Þá hefur hann hvatt egypsk stjórnvöld til að hætta að handtaka og ráðast á fréttamenn og aðgerðarsinna. Egypska innanríkisráðuneytið eigi að hemja sig og sú stefna eigi að liggja skýrt fyrir að refsiaðgerðum verði ekki beitt gegn almenningi.

Mótmælin í Kaíró í gær voru þau fjölmennustu frá því þau hófust þann 25. janúar sl. Fólk fjölmennti á götum úti þrátt fyrir að ríkisstjórn landsins hafi lýst því yfir að friðsöm valdaskipti séu í farvegi.

• 1 blogg um fréttina

Bloggað um fréttina

• Torfi Kristján Stefánsson: Tvískinnungur!