Erlent | AFP | 13.2.2011 | 8:18

Mótmælendur reknir heim

Mótmælendur áttu í útistöðum við egypska hermenn á Tahir torgi í Kaíró í dag. Reuters

Egypskir hermenn eru nú að reka mótmælendur af Tahir torgi í Kaíró en mótmælendur settust þar að fyrir 20 dögum og hétu því að víkja ekki fyrr en umbætur hefðu verið gerðar. BBC greindi frá þessu.

Hermenn lentu í útistöðum við nokkra tugi þaulsætinna mótmælenda sem neituðu að yfirgefa Tahir-torg í miðborg Kaíró. Torgið var helsti vettvangur mótmælanna sem steyptu Hosni Mubarak forseta af stóli.

Hundruð þúsunda mótmælenda sem höfðu dvalið á torginu tóku saman föggur sínar og sneru heim eftir afsögn Mubaraks á föstudaginn var. Herinn tók þá við völdum og hét því að vinna að lýðræðislegum umbótum.

Nokkrir mótmælendanna neituðu þó að yfirgefa torgið fyrr en loforðunum um umbætur yrði hrundið í framkvæmd, að sögn ljósmyndara á vegum AFP fréttastofunnar.

Þegar hermenn báðu mótmælendurna að fara kyrjuðu þeir: „Mótmælum, mótmælum þar til við fáum kröfum okkar fullnægt.“ Hermennirnir drógu sig þá til baka en létu síðan skríða til skarar.

Umferð um hluta torgsins er nú að mestu komin í eðlilegt horf eftir 18 daga mótmælin sem lokuðu fyrir umferðina um torgið.