Vúdúkynlíf fór úr böndunum

Eldri kona lést og um tuttugu slökkviliðsmenn slösuðust þegar kynlíf með vúdúívafi endaði illa. Var aðdragandinn sá að bandarísk kona greiddi vúdútrúarpresti semsvarar um 36.000 krónum fyrir að framkvæma helgiathöfn í svefnherbergi hennar í Brooklyn-hverfi í New York.

Presturinn kom fyrir kertum umhverfis rúmið en athöfnin var með kynlífsívafi, án þess að það sé tilgreint nánar í bandarískum fjölmiðlum. 

Vildi þá svo illa til að kertin féllu um koll svo að kviknaði í rúmlökum.

Turtildúfurnar brugðust þá rangt við aðstæðum og opnuðu glugga til að reykræsta svefnherbergið.

Við það blés inn hávaðarok svo að eldurinn magnaðist í súrefninu. Varð ekkert við ráðið og flúði fólkið úr húsinu, sem er fjölbýlishús.

Eldurinn breiddist hratt út og endaði sem fyrr segir með dauðsfalli.

Um 200 slökkviliðsmenn frá 44 slökkviliðum börðust við eldinn í sjö klukkustundir áður en þeim tókst að ráða niðurlögum hans.

• 1 blogg um fréttina

Bloggað um fréttina

• Ásgrímur Hartmannsson: Þetta er það súrasta sem ég hef lesið í viku