Erlent | mbl | 7.3.2011 | 20:28

Íhuga hernaðaraðgerðir í Líbíu

Barack Obama Bandaríkjaforseti varaði í dag þá sem taka stöðu með Muammar Gaddafi, einræðisherra Líbíu, við því að Nató íhugi að grípa til hernaðaraðgerða til að bregðast við versnandi ástandi í landinu.

„Ég vil senda mjög skilaboð til allra þeirra sem styðja við bakið á Gaddafi, að það er undir þeim sjálfum komið hvernig þeir haga næstu skrefum. Og þeir verða látnir sæta ábyrgð fyrir hvers kyns ofbeldi sem heldur áfram að eiga sér stað þar. Í millitíðinni er Nató, í þessum töluðu orðum, að ráðfæra sig í Brussel um hugsanlegar víðfeðmar aðgerðir, þar á meðal hernaðarlegar."

Í Líbíu takast hersveitir ríkisstjórnarinnar og uppreisnarmanna á um yfirráð yfir landinu í blóðugum bardögum. Ekki hefur ríkt einhugur í alþjóðasamfélaginu um hvort hernaðarleg afskipti séu réttlætanleg. Bretar og Frakkar eru sammála um að setja eigi flugbann yfir Líbíu til að koma í veg fyrir loftárásir Gaddafi á þjóð sína og hyggjast leggja slíka tillögu fyrir Öryggisráð SÞ í vikunni. Arabaríkin við Persaflóa hafa lýst yfir stuðningi sínum við slíkt bann.

Rússar lýstu því hinsvegar yfir í dag að þeir væru mótfallnir hvers konar hernaðaríhlutun í Líbíu. Rússneski utanríkisráðherrann, Sergei Lavrov, sagðist ekki telja það neina lausn á vandanum að grípa inn í, líbíska þjóðin þyrfti sjálf að fá að leiða málið til lykta. Bandaríkjamenn samþykkja að það sé ótímabært að afhenda líbískum stjórnarandstæðingum vopn. Bandaríkjaher hefur lagt á ráðinn um hernað á landi, frá sjó og lofti í Líbíu ef til þess komi að hernaðaríhlutun verði samþykkt. Varnarmálaráðherra Bandaríkjanna, Robert Gates, segir hinsvegar að samþykki alþjóðasamfélagsins verði að liggja fyrir áður en gripið verði til vopna.