Flugbann kallar á loftárásir

Hillary Clinton, utanríkisráðherra Bandaríkjanna, segir að ef Sameinuðu þjóðirnar samþykki flugbann yfir Líbíu þá verði menn að gera loftárásir á hernaðarlega mikilvæg skotmörk í landinu til að draga úr hernaðarmætti hersveita Gaddafis Líbíuleiðtoga.

Alþjóðasamfélagið íhugar nú að grípa til að hertra aðgerða til að vernda óbreytta borgara og setja þrýsting á Gaddafi.

„Flugbann kallar á það að gripið verði til ákveðinna aðgerða til að vernda flugvélar og flugmenn, m.a. með því að gera sprengjuárásir á varnarkerfi Líbíu,“ sagði Clinton. 

Hún segir að innan SÞ sé nú rætt um að ríki hafi heimildir á breiðum grundvelli til að framfylgja þeim aðgerðum sem SÞ komi til með að samþykkja. Clinton segir að ekki sé verið að ræða um að senda landgönguliða inn í Líbíu.

Clinton er í opinberri heimsókn í Túnis og er þetta fyrsta heimsókn hennar til landsins frá því mótmælendur komu leiðtoga landsins frá völdum í upphafi ársins.

Hillary Clinton, utanríkisráðherra Bandaríkjanna. Reuters

• 1 blogg um fréttina

Bloggað um fréttina

• Haraldur Haraldsson: Flugbann kallar á loftárásir/bara að það verði ekki of seint …