Öldruð kona og ungur drengur fundust í morgun á lífi í borginni Ishinomaki í Japan, 9 dögum eftir að flóðbylgja fór yfir borgina.

Talsmaður lögreglunnar í Ishinomaki segir, að áttræð kona og 16 ára gamall drengur, barnabarn konunnar, hafi fundist undir rústum. Fólkið hafi verið orðið mjög kalt en var með meðvitund. 

Lögreglan sagði að fólkið hefði verið flutt á sjúkrahús en ekki væri vitað nánar um líðan þess.