Ríkisstjórn Portúgals fallin

Jose Socrates forsætisráðherra Portúgals tilkynnti í kvöld að ríkisstjórn landsins hefði sagt af sér. Ástæðan er sú að frumvarp stjórnarinnar um niðurskurð í ríkisútgjöldum og hækkun skatta var fellt í atkvæðagreiðslu.

Ríkisstjórn Sósíalistaflokksins er minnihlutastjórn sem nýtur aðeins stuðnings 97 þingmanna af 230 sem eiga sæti á þinginu. Allir fimm stjórnarandstöðuflokkarnir greiddu atkvæði gegn tillögunum stjórnarinnar.

Socrates hafði fyrir atkvæðagreiðsluna hótað afsögn og hann gekk á fund forseta landsins í kvöld og tilkynnti honum að ríkisstjórnin hefði sagt af sér.

Á morgun hefst leiðtogafundur Evrópusambandsins þar sem m.a. á að ræða um stöðu evrunnar.

Seðlabanki Evrópu og framkvæmdastjórn ESB tóku þátt í að móta þær tillögur sem felldar voru í þinginu í dag.

• 2 blogg um fréttina

Bloggað um fréttina

• Sigurður Haraldsson: Taka til fyrirmyndar!
• Kristbjörg Þórisdóttir: Baráttukveðjur frá Michael Hudson, Portúgal og Hawaii