Fjölmiðlar kynni sér aðstæður Mannings

Bandaríkjaher hefur ákveðið að leyfa fjölmiðlum að skoða herfangelsi í Kansas þar sem hermaðurinn Bradley Manning, sem er grunaður um að hafa lekið ríkisleyndarmálum til WikiLeaks, er vistaður.

Í síðustu viku var Manning fluttur frá Marine fangelsinu í Quantico í Virginíu til Fort Leavenworth í kjölfar ásakana um illa meðferð.

Ofurstinn Tom Collins, talsmaður Bandaríkjahers, segir að í skoðunarferðinni muni fjölmiðlum gefast tækifæri að sjá þær aðstæður sem Manning búi við. Collins segir að það liggi í augum uppi að kringumstæður Mannings séu óvenjulegar.

Manning þarf, líkt og aðrir fangar, að undirgangast sérfræðimat áður en réttarhöld geta hafist. Andleg heilsa hans er á meðal þess sem verður kannað. Þá mun liggja fyrir hvort hann sé sakhæfur og réttarhöld geti þá hafist. Collins segir að þeirri vinnu muni brátt ljúka. 

Manning er grunaður um að hafa komist yfir leyniskjöl þegar hann starfaði við greiningu á leyniþjónustuupplýsingum í Írak. Ákæruliðirnir eru tæplega 20, en hann er m.a. ákærður fyrir að aðstoða óvininn. Verði hann fundinn sekur um um þann lið ákærunnar gæti hann átt yfir höfði sér dauðarefsingu eða lífstíðarfangelsi.

Bradley Manning.

• 1 blogg um fréttina

Bloggað um fréttina

• Ómar Geirsson: Alvarleg augun er misjöfn milli ríkja.