Sagðir hafa varað Bin Laden við

Ef marka má gögn sem uppljóstranasíðan Wikileaks hefur birt aðstoðuðu pakistanskir leyniþjónustumenn hryðjuverkaleiðtoganum Osama Bin Laden við að komast undan Bandaríkjamönnum í áratug með því að láta hann vita þegar bandarískir hermenn voru í nágrenninu.

Samkvæmt gögnunum var bandarískum embættismönnum tjáð að þetta hafi verið ein af ástæðum þess að Bandaríkjamönnum hafði fram að því ekki tekist að hafa hendur í hári Bin Ladens.

Þá er því einnig haldið fram í gögnunum að pakistanska leyniþjónustan hafi smyglað hryðjuverkamönnum á vegum al-Qaeda í gegnum öryggisleit á flugvöllum til þess að forða þeim frá handtökum og jafnvel sent sérstaka sveit til Afganistan til þess að berjast með Talibönum.

Ljóst þykir að gögnin muni auka enn á þá tortryggni sem er til staðar í garð stjórnvalda í Pakistan og vilja þeirra til þess að berjast gegn al-Qaeda.

• 1 blogg um fréttina

Bloggað um fréttina

• Hilmar Örn: flottur áróður