Erlent | AFP | 5.5.2011 | 12:23

Nota sjóði Gaddafi gegn honum

Alain Juppe, utanríkisráðherra Frakklands Reuters

Alain Juppe, utanríkisráðherra Frakklands, segir daga Moamer Gaddafi senn talda og að honum hafi ekkert orðið ágengt frá fyrstu vikum átakanna í Líbýu. Þjóðarleiðtogar fjölda ríkja funduðu vegna vegna stöðunnar í landinu í dag.

Fundinn sóttu, auk Juppe, Hillary Clinton, utanríkisráðherra Bandaríkjanna, Anders Fogh Rasmussen framkvæmdastjóri Atlantshafsbandalagsins og leiðtogi uppreisnarmanna í Líbýu, Mahmud Jibril, meðal annarra.

Á það var fallist að tryggja þyrfti uppreisnarmönnum fjármagn, og yrði það meðal annars sótt í frysta sjóði Gaddafi víða um heim. Evrópusambandið og Bandaríkin hafa fryst allt að 60 milljarða dala ýmist á bankareikningum eða í formi fjárfestinga.

Uppreisnarmenn í Líbýu segjast þurfa í það minnsta þriggja milljarða dala lánalínu nú þegar til þess að koma í veg fyrir efnahagslegt hrun í austurhluta landsins, sem þeir hafa yfirráð yfir.

Hillary Clinton segir Bandaríkjamenn ætla að sér að setja löggjöf sem heimili þeim að taka hluta líbýskra eigna í landinu og nota í þessum tilgangi. Þá verði einnig reynt að liðka fyrir því að uppreisnarmenn geti selt olíu úr landinu, sem myndi bæta fjárhagsstöðu þeirra.

Franco Frattini, utanríkisráðherra Ítalíu, leggur á það áherslu að ná verði pólitískri lausn á vanda Líbýu og bætti því við að til þess að vopnahlé yrði trúverðugt væri nauðsynlegt að Gaddafi færi frá völdum.

Uppreisnarmenn segja 10 þúsund manns hafa fallið í átökunum í Líbýu til þessa.