Fái sömu meðferð og Bin Laden

Bandaríkjamenn sögðu í dag arftaka Osama Bin Laden í starfi, Ayman al-Zawahiri, ekki annað en föla eftirhermu af forvera sínum og vöruðu hann jafnframt við því að hans biðu án vafa sömu örlög og Bin Laden hlaut.

Yfirvöld í Bandaríkjunum drógu jafnframt upp á þá mynd af al-Zawahiri að hann væri „hægindastóls-hershöfðingi“ sem hefði hvorki reynslu af bardögum né útgeislun og leiðtogahæfileika. Ennfremur væri hann umdeildur og gæti skaðað Al-Kaída.

Mike Mullen, aðmíráll í bandaríska hernum, sagði Zawahiri að búa sig undir sömu meðferð og Bin Laden fékk, sem var drepinn af bandarískum sérsveitarmönnum 2. maí síðastliðinn.

„Við leituðum að Bin Laden í því augnamiði að drepa hann og það tókst. Við munum án nokkurs vafa leita að sömu niðurstöðu með Zawahiri,“  sagði Mullen í dag.

Robert Gates, varnarmálaráðherra, steig varlegar til jarðar og sagði að útnefningu al-Zawahiri ætti að líta á sem áminningu um að ennþá stafaði ógn af Al-Kaída.   

• 1 blogg um fréttina

Bloggað um fréttina

• Magnús Óskar Ingvarsson: Já en...