Segist verða fyrir einelti vegna Breiviks

Finnski þingmaðurinn Jussi Halla-Aho, sem situr á þingi fyrir stjórnmálaflokkinn Sannir Finnar, segist vera lagður í einelti eftir að Anders Behring Breivik vitnaði í skrif hans. Í stefnuskrá sinni sagði Breivik þá vera skoðanabræður.

Sannir Finnar eru langt til hægri í stjórnmálum og afar þjóðernissinnaðir að auki. Halla-Aho er einnig  félagi í Suomen Sisu, sem er hópur þjóðernissinna.

Halla-Aho segir að atlaga sé gerð að tjáningarfrelsinu og segist engu ráða um það hver vitni í skrif sín.

Finnski sósíaldemókrataflokkurinn dregur hæfni Halla-Aho til þingstarfa í efa, en hann er einn stofnenda spjallrásarinnar Scripta, þar sem fjölmenningu og innflytjendum er fundið flest til foráttu.

Halla-Aho segir að það leysi engan vanda að loka spjallrásum á netinu. „Árásirnar á Tvíburaturnana voru án efa innblásnar af því að lesa Kóraninn, en engum dettur í hug að banna hann.“

Halla-Aho hefur setið á þingi síðan í apríl. Á síðasta ári var hann dæmdur fyrir bloggfærslur sínar þar sem hann skrifaði að allir sómalískir innflytjendur væru glæpamenn og líkti íslamstrú við barnaníð.

• 1 blogg um fréttina

Bloggað um fréttina

• Ómar Ragnarsson: Jarðvegur hatursins.