Óvíst með refsingu Breiviks

Verði Anders Behring Breivik fundinn ósakhæfur, þarf það ekki að þýða að hann fái málamyndarefsingu.

Verði niðurstaðan sú, að hann hafi ekki verið í sakhæfu ástandi þann 22. júlí, þegar hann framdi voðaverkin í Ósló og Útey, verður hann líklega dæmdur til dvalar og meðhöndlunar á geðdeild. 

Frá þessu segir á vefsíðu norska dagblaðsins Aftenposten. Þar segir Pål  Grøndal, sálfræðingur, að Breivik gæti hugsanlega útskrifast af sjúkrahúsinu eftir þrjár vikur og eftir það búið í eigin íbúð og haldið áfram meðfeð.

„Tilgangurinn með meðferðinni er að minnka líkurnar á að viðkomandi fremji glæpi að nýju,“ segir Grøndal.

Samkvæmt norskum lögum er heimilt að sækja fólk til saka eftir að meðferð er lokið og viðkomandi talinn sakhæfur. Það mun þó einungis einu sinni hafa verið gert áður.

Skipaður hefur verið hópur sérfræðinga til að meta andlegt ástand Breiviks.

Adrian Pracon, einn þeirra sem Breivik skaut, segist eiga erfitt með að hugsa sér að Breivik verði dæmdur til nokkurra ára fangelsisvistar. „Ég get ekki sætt mig við að hann verði dæmdur til  20 ára fangelsisvistar  eftir að hafa myrt næstum því eitt hundrað vini mína,“ segir Pracon.

Þær hugmyndir hafa verið uppi um að Breivik verði kærður fyrir brot gegn mannkyni, en við því er hámarksrefsingin 30 ár.

Frétt Aftenposten