Fylgishrun hjá Obama

Fylgi forseta Bandaríkjanna, Baracks Obama, hefur minnkað jafnt og þétt undanfarnar vikur og hefur ekki mælst jafn lítið og nú frá því hann var kjörinn forseti fyrir tæpum þremur árum.

Í könnun sem Gallup birti í kvöld mældist fylgi hans í fyrsta skipti undir 40% en samkvæmt könnuninni eru 39% ánægð með störf hans á meðan 54% eru óánægð. Í frétt Los Angeles Times í kvöld kemur fram að aldrei áður hafi jafn fáir verið ánægðir með störf Obama og nú og jafn margir óánægðir.

Fylgi Obama hefur verið rúmlega 40% það sem af er ári en skaust í 53% skömmu eftir að tilkynnt var um dauða Osama Bin Laden, leiðtoga Al-Queda-hryðjuverkasamtakanna. En fylgið minnkaði jafnt og þétt á sama tíma og deilan um skuldaþak ríkissjóðs harðnaði. 

Könnun Gallup var gerð 11.-13. ágúst sl.

• 1 blogg um fréttina

Bloggað um fréttina

• Ómar Ragnarsson: Ræður ekki við hið ómögulega.