Niðursveifla í hergagnaiðnaði

Bandaríkjamenn eru að draga sig út úr stríðinu í Írak og Afganistan, Osama bin Laden er dauður og ríkissjóður Bandaríkjanna er að sökkva í skuldafen. Þetta þýðir minni umsvif í hergagnaiðnaði í Bandaríkjunum og það sést á þróun hlutabréfa í fyrirtækjum sem framleiða hergögn.

Fox-news fjallar um þetta mál í fréttaskýringu sem ber yfirskriftina, „Gullni áratugur fyrirtækja í varnarmálum að ljúka.“

Frá árás Al-Qaeda á Bandaríkin 11. september 2001 hafa hernaðarútgjöld Bandaríkjanna tvöfaldast og farið í 700 milljarða dollara. Hagnaður fyrirtækja í hergagnaiðnaði hefur á sama tíma fjórfaldast og var samtals  25 milljarðar dollara á þessu 10 ára tímabili.

David Berteau, sérfræðingur í varnarmálum, segir í samtali við Fox að toppi útgjaldanna hafi verið náð og nú liggi leiðin niður á við.

Bandaríkjaþing samþykkti í síðasta mánuði að hernaðarútgöld yrðu 350 milljarðar dollara á næstu 10 árum. Samkomulagið gerir ráð fyrir frekari niðurskurði á útgjöldum ríkissjóðs, en þingið hefur frest fram í nóvember til að ná samkomulagi um hvernig þetta verður útfært.

Fox segir að á tímabilinu 1985-1997, en þá voru hernaðarútgöld Bandaríkjanna í lágmarki, hafi verð hlutabréfa í fyrirtækjum sem framleiða hergögn, hækkað 33% minna en verð annarra hlutabréfa. Líklegt sé að svipuð þróun eigi sér stað á næstu árum.