11 ára óeirðaseggur og tunnuþjófur

Ellefu ára drengur var í dag dæmdur til samfélagsþjónustu fyrir að hafa tekið ruslatunnu ófrjálsri hendi í óeirðunum sem brutust út í Lundúnum fyrr í mánuðinum en hann er yngsti sakborningurinn sem hefur hlotið dóm vegna þátttöku sinnar í óeirðunum.

Drengurinn stal ruslatunnunni, sem kostar um 55 evrur eða níu þúsund krónur, úr gluggaskreytingu Debenhams-verslunar í hverfinu Romford 8. ágúst síðastliðinn eftir að gengi óeirðaseggja hafði brotið rúður verslunarinnar.

Lögreglumaður stóð hann að verki en við dómsúrskurðinn sagði dómarinn að hann liti brotið afar alvarlegum augum.

„Ef þú værir aðeins eldri hefðirðu endað í fangelsi,“ sagði dómarinn við piltinn. „Þú þarft að skilja það að þú kemst ekki upp með að fremja brot af þessu tagi.“

Í dómnum sem pilturinn hlaut felst meðal annars að staðaryfirvöld munu úrskurða um hvar hann verður látinn dvelja næstu sex mánuði.

Nokkrum dögum áður en óeirðirnar brutust út hafði lögregla afskipti af drengnum eftir að hann risti göt á sætisáklæði í strætó og reyndi að kveikja í svampfyllingunni.

Alls hefur lögreglan í Lundúnum handtekið 2.124 einstaklinga í kjölfar óeirðanna og 1.221 hefur verið ákærður.

• 1 blogg um fréttina

Bloggað um fréttina

• Ásgeir Jóhann Bragason: Það má aldrei neitt