Vill að mynduð verði samsteypustjórn

Forsætisráðherra Grikklands, George Papandreou, hvatti til þess að mynduð yrði samsteypustjórn í landinu svo hægt yrði að bjarga landinu úr skuldafeninu sem það situr fast í.

Papandreou hefur hingað til verið mótfallinn því að Grikkir gangi fyrr að kjörborðinu en til stóð en á gríska þinginu í kvöld kvað við annan tón þar sem hann útilokaði ekki þann möguleika. Greiða á atkvæði um vantraust á ríkisstjórn Grikklands á morgun. Stjórnarandstaðan hefur krafist þess að Papandreou segi af sér og gengið verði til þingkosninga sem fyrst.

Hann segir nauðsynlegt að hefja viðræður strax um að mynda samsteypustjórn til þess að hægt verði að koma á eðlilegu ástandi í pólitísku landslagi Grikklands. Samstarf sé nauðsynlegt milli grískra stjórnmálaflokka svo hægt sé að byggja upp traust meðal almennings. Hann segist reiðubúinn til þess að hætta við boðaða þjóðaratkvæðagreiðslu um björgunarpakka sem leiðtogar Evrópusambandsins samþykktu nýverið.

• 1 blogg um fréttina

Bloggað um fréttina

• Heimssýn: ESB leggur línurnar í grískum stjórnmálum