Arababandalagið á neyðarfundi

Arababandalagið hittist á neyðarfundi í dag þar sem málefni Sýrlands verða rædd, en Sýrlendingar hafa virt að vettugi tilmæli bandalagsins um lýðræðislegar umbætur í landinu. Sýrlenskar öryggissveitir skutu að minnsta kosti tólf manns til bana í dag eftir bænahald, en í dag er einn heilagasti dagur múslíma.

Á fundinum verða utanríkisráðherrar arabalandanna. Bashar al-Assad, forseti Sýrlands, hét því í síðustu viku að binda enda á blóðbaðið í landinu, en efndir voru litlar og dagurinn í dag er fjórði dagurinn í röð þar sem öryggissveitir myrða óbreytta borgara í landinu.

Sheikh Hamad bin Jassem al-Thani, forsætisráðherra Katar og talsmaður hópsins, segir að ef Sýrlendingar virði ekki ákvarðanir og tilmæli Arababandalagdsins verði íhugað að grípa til aðgerða.

Nabil al-Arabi, formaður Arababandalagsins, segir að afleiðingarnar gætu orðið Sýrlendingum skeinuhættar og krefst þess að blóðbaðinu linni tafarlaust.

Níu þeirra sem myrtir voru í dag voru í hverfinu Baba Amro í borginni Homs, þar sem mótmæli hafa verið afar tíð.
Einnig voru tveir óbreyttir borgarar skotnir til bana í borginni Hama, sem er í norðurhluta landsins og einn í Idlib-héraði, sem er skammt frá landamærunum að Tyrklandi.

Að auki særðust fjórir mómælendur í bænum Talvi eftir að öryggissveitir skutu á hóp mótmælenda og tugir manna særðust þegar skotið var á mótmælendur í bænum Kafruma.

Að auki skutu öryggissveitir á mótmælendur og beittu táragasi í Kafar Susseh-hverfinu í höfuðborginni Damaskus.

Talið er að að minnsta kosti 60 hafi fallið fyrir skothríð öryggissveita síðan Assad skrifaði undir friðarsamkomulag Arababandalagsins hinn 2. nóvember.

• 1 blogg um fréttina

Bloggað um fréttina

• Torfi Kristján Stefánsson: Katar og arabíska byltingin