Varað við mögulegu hruni evrusvæðisins

Breska utanríkisþjónustan hefur fyrirskipað sendiráðum Bretlands í ríkjum Evrópusambandsins að vera reiðubúin að koma breskum þegnum í þessum ríkjum til aðstoðar ef sú staða kemur upp að evrusvæðið hrynji og þeir geti ekki fengið aðgang að bankareikningum sínum eða tekið út peninga.

Sendiráðunum hefur einnig verið fyrirskipað að búa sig undir það að koma breskum ríkisborgurum til aðstoðar ef hugsanlegt hrun evrusvæðisins leiði til óeirða innan Evrópusambandsins.

Fréttavefurinn Euobserver.com greinir frá þessu í dag og einnig því að tvö stærstu viðskiptablöð heimsins, Financial Times og Economist, hafi nýverið varað við því að hrun evrusvæðisins kynni að vera á næsta leiti.

Haft er eftir dálkahöfundi Financial Times, Wolfgang Munchau, að evrusvæðið eigi aðeins eftir að lifa í tíu daga nema teknar verði róttækar ákvarðanir á ráðstefnu leiðtoga ESB sem fram fer 9. desember næstkomandi. Þá hafi komið fram í nýlegum leiðara Economist að evrusvæðið gæti hrunið innan nokkurra vikna.

• 3 blogg um fréttina

Bloggað um fréttina

• Lísa Björk Ingólfsdóttir: Vill Samfylkingin samt halda áfram aðildarviðræðum?
• Högni Jóhann Sigurjónsson: Evran er verðtryggð
• Guðmundur Paul: Jómfrúarferðin 1912