Palestínumenn ,,uppdiktuð" þjóð

Salam Fayyad, forsætisráðherra Palestínu, hvatti í dag eitt af forsetaefnum repúblikana í Bandaríkjunum, Newt Gingrich, til að draga til baka þau ummæli í viðtali að Palestínumenn væru „uppdiktuð“ þjóð. Gingrich ætti að biðjast afsökunar á „þessum ruddalegu og fáránlegu ummælum“. Þau væru afbökun á sagnfræðilegum staðreyndum.

Gingrich, sem er fyrrverandi forseti fulltrúadeildar þingsins, hefur nú mest fylgi af þeim sem hafa gefið kost á sér sem forsetaefni repúblikana. Hann sagði að Palestínumenn væru í reynd afkomendur araba úr ýmsum áttum sem hefðu síðan farið að kalla sig þjóð. „Þeir áttu þess kost að fara til margra landa. Og af margvíslegum pólitískum orsökum hefur verið haldið áfram þessu stríði gegn Ísrael alveg frá fimmta áratugnum og ég tel að þetta sé harmleikur.“

Sagðist Gingrich að mörgu leyti hafa sömu heimssýn og Benjamin Netanyahu, forsætisráðherra Ísraels, og hét því að verða „mun harðari og heiðarlegri“ gagnvart vandamálum Mið-Austurlanda ef hann næði kjöri.

• 3 blogg um fréttina

Bloggað um fréttina

• Mofi: Tilbúinn vandi?
• Axel Jóhann Hallgrímsson: Dæmigerður hægri bjáni
• Kristin stjórnmálasamtök: Er eitthvað til í því sem Newt Gingrich segir um …