Fagna dauða Kims Jong-Ils

Margir íbúar í Suður-Kóreu hafa fagnað dauða Kims Jongs-Ils, fyrrverandi leiðtoga Norður-Kóreu, sem var borinn til grafar í dag. Sumir opnuðu kampavínsflöskur og skutu upp flugeldum í tilefni dagsins.

Í Seoul, höfuðborg S-Kóreu, komu mótmælendur saman í dag til að fordæma norðurkóresk stjórnvöld. S-Kóreumenn eru óánægðir með að Kim Jong-un, yngsti sonur Kims Jongs-Ils, hafi tekið við stjórnartaumunum í norðri. Margir vilja sjá sameiningu ríkjanna á Kóreuskaganum.

Íbúar sem hafa náð að flýja N-Kóreu slepptu blöðrum við landamærin í dag þar sem var að finna bæklinga þar sem stjórnvöld í norðri eru harðlega gagnrýnd.

„Íbúar Norður-Kóreu hafa lifað sem þrælar í 66 ár undir stjórn Kims Ils-sungs og Kims Jongs-Ils. Hvernig geta þeir lifað undir stjórn Kims Jongs-uns sem er smákrakki, eins og skítugur hvolpur? Við megum ekki sætta okkur við að þriðja kynslóðin taki við í Norður-Kóreu,“ sagði Park Sang-Hak, sem tókst að flýja til S-Kóreu.

Um 200.000 bæklingar voru í blöðrunum sem var sleppt í dag. Þar var einnig að finna peninga, eða samtals um 1.000 dali (um 123 þúsund kr.)

„Burtséð frá því sem tengist stjórnmálum, þá vil ég sem manneskja votta þeim samúð mína. Ef við horfum fram á veginn og viljum sameinast í framtíðinni, þá verðum við að opna huga okkar,“ segir Kim Hyun-hee.

Kim Jong-un verður þriðji ættliðurinn sem mun stjórna Norður-Kóreu, sem er bæði einangrað og óútreiknanlegt ríki.

Margir sérfræðingar kalla undanfarin 20 ár í Norður-Kóreu „Gönguna miklu aftur á bak.“

• 2 blogg um fréttina

Bloggað um fréttina

• Ómar Ragnarsson: Sannur grátur miðað við forsendur ?
• Haraldur Haraldsson: Fagna dauða Kims Jong-Ils///Ljót að segja :en satt samt!!!