Vilja að refsiaðgerðir verði hertar

Alain Juppe, utanríkisráðherra Frakklands, segir að frönsk stjórnvöld séu sannfærð um að yfirvöld í Íran séu að framleiða kjarnorkuvopn og því eigi að beita Írana enn harðari refsiaðgerðum.

Juppe hvetur önnur Evrópusambandsríki til að feta í fótspor Bandaríkjanna og frysta eignir íranska seðlabankans. Jafnframt eigi að banna innflutning á olíu frá Íran, að því er fram kemur á vef breska ríkisútvarpsins.

„Íranar eru að þróa kjarnorkuvopn, ég hef engar efasemdir um það,“ sagði utanríkisráðherrann í samtali við frönsku sjónvarpsstöðina I-Tele.

„Nýjasta skýrsla Alþjóðakjarnorkumálastofnunarinnar er skýr hvað það varðar,“ bætti Juppe við.

Stjórnvöld í Íran vísa öllu slíku tali á bug. Í gær neituðu þau að aðgerðir Bandaríkjanna hefðu haft áhrif á stöðu gjaldmiðilsins, sem er í sögulegu lágmarki. Þá hafa þau ávallt neitað ásökunum um að Íran sé að framleiða kjarnorkuvopn.

Stjórnvöld í Teheran segja að kjarnorkuáætlun landsins miði að því að framleiða rafmagn fyrir landsmenn.

Í nóvember sl. greindu Bandaríkin, Kanada og Bretland frá nýjum refsiaðgerðum sem þau hygðust beita Írana. Ákvörðunin kom í kjölfar birtingar nýrrar skýrslu Alþjóðakjarnorkumálastofnunarinnar. Þar kom fram að Íranar hefðu gert tilraunir sem tengdust þróun á kjarnorkuvopni.

Málið lenti aldrei á borði öryggisráðs Sameinuðu þjóðanna því bæði Rússar og Kínverjar voru mótfallnir öllu slíku.

Alain Juppe, utanríkisráðherra Frakklands. Reuters

• 1 blogg um fréttina

Bloggað um fréttina

• el-Toro: rangur punktur á fréttinni