Evrukrísan Þjóðverjum að kenna

Alþjóðavinnumálastofnunin, ILO, segir efnahagsstefnu Þýskalands undanfarna tvo áratugi eina af ástæðum þess að evrusvæðið stríði nú við mikinn skuldavanda. Er það mat stofnunarinnar að þýskir framleiðendur hafi hagnast á þeirri stefnumörkun þýskra stjórnvalda að halda launum í lágmarki en á kostnað annarra evruríkja.

ILO segir þau vandræði sem evrusvæðið glími við nú vera arf fortíðarinnar en eftir sameiningu Þýskalands 1990, og sérstaklega í stjórnartíð kanslarans Gerhard Schroeder, hafi þýsk stjórnvöld gert allt sem þau gátu til þess að halda launakostnaði niðri, til þess að auka samkeppnishæfni og vinna gegn atvinnuleysi í landinu.

„Bent hefur verið á aukna samkeppnishæfni þýskra fyrirtækja sem undirliggjandi ástæðu þeirra erfiðleika sem steðja að evrusvæðinu,“ segir í skýrslu ILO um horfur í efnahagsmálum 2012.

„Í Evrópu hefur þetta skapað aðstæður fyrir langvarandi efnahagslægð og önnur evruríki sjá sér engar leiðir færar til að bæta samkeppnisstöðu sína nema að fara í enn meiri launalækkanir.“

ILO segir velgengni Þýskalands í efnahagsmálum ekki að þakka lágum launum eða samkeppnisfærni heldur því að helstu útflutningsmarkaðir þess væru í ört vaxandi löndum, t.d. í Asíu.

Yrði endi bundinn á láglaunastefnuna í Þýskalandi myndi það hafa víðtæk jákvæð áhrif í Evrópu og einnig leiða til sanngjarnari launadreifingar meðal Þjóðverja.

• 1 blogg um fréttina

Bloggað um fréttina

• Kristján H. Kristjánsson: Heimskuleg gagnrýni