Norski fjöldamorðinginn Anders Behring Breivik hefur áhuga á því að mæta í viðtal hjá útlendri sjónvarpsstöð. Viðtalið yrði það fyrsta við Breivik frá því hann framdi ódæðisverkin í júlí.

Verjandi Breivik, Geir Lippestad, segir í samtali við norska dagblaðið Verdens Gang í dag að hann hafi ráðlagt Breivik að samþykkja engin viðtöl áður en réttarhöldin hefjast í apríl en Breivik hafi ítrekað sagst hafa áhuga á að fara í viðtal við útlenda sjónvarpsstöð.

Fjölmargir fjölmiðlar, bæði norskir og erlendir, hafa reynt að fá viðtal við Breivik í öryggisfangelsinu Ila þar sem hann er í haldi. 

Breivik var úrskurðaður ósakhæfur í desember en réttarhöldin yfir honum hefjast 16. apríl nk.

Vibeke Hein Bæra, einn lögmanna Breivik, segir í samtali við AFP-fréttastofuna að Breivik hafi ákveðnar fréttastofur í huga en það þýði hins vegar ekki að samkomulag hafi verið gert um viðtal. Frá því um miðjan desember hafa gestir fengið að heimsækja Breivik í fangelsið og hann að fylgjast með fjölmiðlum.

Breivik, sem segist vera í krossferð gegn fjölmenningu og innrás múslima í Evrópu, kom fyrir bílsprengju við opinberar byggingar í miðborg Óslóar 22. júlí í fyrra. Átta létust í tilræðinu. Hann fór þaðan til Úteyjar og klæddur í lögreglubúning skaut hann 69 til bana, aðallega unglinga sem voru þar í sumarbúðum á vegum ungliðahreyfingar jafnaðarmanna.

Anders Behring Breivik Reuters

Tengdar fréttir

Fjöldamorðið í Útey/Anders Behring Breivik

Biður um reynslulausn 13 árum eftir fjöldamorðið

• Breivik tapaði máli gegn ríkinu
• „Enn hættulegasti maður Noregs“
• Notar geðlyf til að komast í gegnum daginn
• Breivik reynir aftur að losna úr einangrun

» Fleiri tengdar fréttir

• 1 blogg um fréttina

Bloggað um fréttina

• Jón Ríkharðsson: Það á að einangra illmennið algerlega frá umheiminum.