Tólfti hver verður til á tilraunastofu

Um tólfti hver Dani verður ekki til við kynmök, heldur við tæknifrjóvganir af ýmsu tagi. Þetta kemur fram í tölum frá dönskum heilbrigðisyfirvöldum. Þar segir að árið 2010 hafi 4.744 dönsk börn fæðst eftir tæknifrjóvgun, en alls voru tæplega 37 þúsund slíkar aðgerðir af ýmsu tagi framkvæmdar, bæði á sjúkrahúsum og á einkastofum.

Á vefsíðu danska dagblaðsins Politiken segir að um 30.000 þessara aðgerða hafi verið framkvæmdar á dönskum konum, en einnig voru gerðar aðgerðir á konum sem komu gagngert í þessum erindagjörðum til Danmerkur. Flestar þeirra komu frá Svíþjóð, Noregi og Bretlandi.

Talsvert meiri líkur eru á tvíburafæðingum við tæknifrjóvgun, eða 10-15%. Venjulega eru líkurnar á því að eignast tvíbura um 2%.

• 1 blogg um fréttina

Bloggað um fréttina

• Sigurður Hlynur Snæbjörnsson: Merkileg tilraun sem vonandi tekst.