Hótar að draga Frakkland úr Schengen

Nicolas Sarkozy, forseti Frakklands, hótaði því dag að hann myndi binda enda á þátttöku Frakklands í Schengen-samstarfinu ef reglum þess yrði ekki breytt í þeim tilgangi að hindra flæði ólöglegra innflytjenda.

„Að 12 mánuðum liðnum, ef það hafa engar alvarlegar framfarir átt sér stað í þessum málum, þá mun Frakkland binda enda á þátttöku sína í Schengen-samstarfinu þangað til að samningaviðræðum um málið lýkur,“ sagði Sarkozy á kosningafundi í nágrenni við París, höfuðborg Frakklands, í dag.

Að sögn Sarkozy er þörf á nauðsynlegum aðgerðum til þess að stemma stigu við flæði ólöglegra innflytjenda en hann hefur á síðustu misserum nálgast skoðanir öfga-hægrimanna í málefnum innflytjenda í von um að auka líkur sínar á að ná endurkjöri í frönsku forsetakosningunum sem haldnar verða í apríl og maí.

„Við verðum að ráðast í endurbætur á Schengen sem eru jafn skipulegar og endurbæturnar sem við erum nýbúin að ráðast í á evrunni,“ sagði Sarkozy á fundinum og bætti við að Evrópusambandið ætti að hafa heimildir til þess að refsa þeim aðildarríkjum Schengen sem lokuðu ekki almennilega landamærum sínum.

• 2 blogg um fréttina

Bloggað um fréttina

• Kolbrún Hilmars: Fyrir hvern var Schengen?
• Róbert Björnsson: Kjarnorku mótmælt í Schengen