Serbinn Milorad Pelemis, sem norski fjöldamorðinginn Anders Behring Breivik segist hafa hitt í Líberíu, segir fullyrðingar Breiviks fjarstæðu. Bosnískt dagblað heldur öðru fram og segir hann hafa verið í Líberíu á sama tíma og Breivik.

„Þetta er rugl. Ég hef aldrei hitt hann, ég hef aldrei verið í Líberíu. Þetta eru falskar ásakanir, ég er heiðarlegur maður og hef engu að leyna,“ sagði Pelemis við norska blaðið Dagbladet, sem fór á stúfana og hafði uppi á honum í borginni Belgrad. 

Breivik fór til Líberíu árið 2002. Við yfirheyrslurnar í síðustu viku sagði hann að erindi sitt þangað hefði verið að hitta serbneska stríðshetju til skrafs og ráðagerða, en téð hetja hefði verið á flótta frá Alþjóðaglæpadómstólnum í Haag. Hann sagði að litið væri á þennan mann sem þjóðhetju vegna baráttu sinnar við múslíma.

Hann sagðist telja að fundur þeirra hefði átt sér stað í Líberíu vegna þess að mótaðilinn hefði litið á það sem próf á staðfestu hans varðandi málstaðinn og ýjaði að því að Serbinn hefði verið samverkamaður sinn.

Pelemis var yfirmaður í serbneska hernum og framdi herdeild hans ýmis voðaverk í Bosníustríðinu. Hann hefur ekki verið kallaður fyrir dómstólinn, en nafn hans hefur ítrekað komið fram í vitnaleiðslum vegna stríðsins. Vitað er að félagar hans í hernum fóru til Líberíu sem málaliðar og að hann var staddur í Líberíu á sama tíma og Breivik.

Svein Holden, ríkissaksóknari í Noregi, segir lögreglu upplýsta um málið og fljótlega verði ákveðið með næstu skref.

Tengdar fréttir

Fjöldamorðið í Útey/Anders Behring Breivik

Enginn meðbyr hjá Breivik

• Gengur fyrir þunglyndislyfjum
• Breivik fer ekki spönn frá rassi
• Hulda saksóknari: „Tökum þetta ekki til greina“
• Biður um reynslulausn 13 árum eftir fjöldamorðið

» Fleiri tengdar fréttir

• 1 blogg um fréttina

Bloggað um fréttina

• Ómar Bjarki Kristjánsson: Engar sannanir fyrir að Pelemis hafi verið í Líberíu.