Forsætisráðherra Finnlands, Jyrki Katainen, hafnaði því alfarið í umræðum í finnska þinginu í dag að tillaga um að Finnar tækju þátt í norrænu samstarfi við að gæta lofthelgi Íslands væri hugsuð til þess að koma Finnlandi inn í Atlantshafsbandalagið (NATO).

Fram kemur á finnska fréttavefnum Yle.fi að stjórnarandstöðuþingmenn hafi gert harða hríð að Katainen vegna málsins en finnsk stjórnvöld hafi lýst sig reiðubúin til þátttöku í verkefninu ef öll hin norrænu ríkin gerðu slíkt hið sama.

Katainen sagði að markmiðið með verkefninu væri að stuðla að nánara samstarfi ríkja við Norður-Atlantshaf og á Norðurlöndunum en ekki að koma á hernaðarbandalagi við NATO eins og stjórnarandstæðingar gerðu skóna að.

Þingmenn stjórnarandstöðunnar spurðu meðal annars að því hvaða áhrif þátttakan kynni að hafa á utanríkisstefnu Finnlands og hvernig Rússar kynnu að bregðast við henni. Katainen svaraði á þá leið að Finnar tækju eigin ákvarðanir í þeim efnum.

Katainen gat ekki upplýst hvenær til stæði að hefja umrætt verkefni en að málið yrði sennilega lagt fyrir utanríkis- og varnarmálanefnd finnska þingsins í haust.

Tengdar fréttir

Varnarmál Íslands

Án fordæma á lýðveldistímanum

• Ágreiningur í VG um aðild að NATO
• Segir öryggi Íslands betur tryggt utan NATO
• Fyrsta heimsóknin til Íslands í áraraðir
• Beint: Formenn ræða hnattrænar áskoranir

» Fleiri tengdar fréttir

• 1 blogg um fréttina

Bloggað um fréttina

• Ómar Ragnarsson: Minnir svolítið á Svía í Kalda stríðinu.