Annað Lehman Brothers-hrun á leiðinni?

Evrukreppan gæti dregið svo úr tiltrú á stórar bankastofnanir að fall risabanka á borð við Lehman Brothers, fjárfestingabankans sem markaði upphaf niðursveiflunnar í Bandaríkjunum haustið 2008, er hugsanlegt með ófyrirséðum afleiðingum.

Kanadíski fjármálasérfræðingurinn Alex Jurshevski heldur þessu fram í viðtalsþætti á kanadísku fjármálasjónvarpsstöðinni BNN en hann aðstoðaði m.a. nýsjálensk stjórnvöld við að greiða úr mikilli skuldaóreiðu fyrir um tveim áratugum og þekkir því innviði skuldabréfamarkaða vel.

Jurshevski heldur úti bloggi á vefsíðu fyrirtækisins sem hann starfar hjá, Recovery Partners, og fullyrðir þar að afskrifa verði hluta af skuldunum sem eru að draga evrusvæðið niður í hringiðu ölduróts. Með því að stafla lánum ofan á lán ofan í neyðarpökkum sé aðeins verið að slá vandanum á frest.

Útlitið ekki jafndökkt síðan haustið 2008

Í umræddum þætti er einnig rætt við Roben Farzad, fjármálasérfræðing hjá Bloomberg Businessweek, sem segir að staðan í alþjóðahagkerfinu hafi ekki verið jafnógnvekjandi síðan í september 2008, eða frá því að Lehman Brothers beið skipbrot. Er tilefnið mikill skuldavandi Spánar og fjármögnunarvandi þarlendra banka.

Þá er rætt við Brian Milner, viðskiptablaðamann hjá The Globe and Mail, helsta dagblaði Kanada, sem kallar eftir styrkari forystu Angelu Merkel Þýskalandskanslara andspænis evrukreppunni. Telur Milner að lausnin liggi í útgáfu sameiginlegra skuldabréfa á evrusvæðinu sem geti tekið þrýstinginn af fjármögnunarvanda ýmissa evruríkja, þar með talið Ítalíu sem eigi erfitt með aðgang að lánsfé um þessar mundir.

Er þessi lausn vitaskuld mjög umdeild enda yrði hún stórt skref í átt til sameiginlegrar hagstjórnar á evrusvæðinu.

Jurshevski telur þessa leið ekki leysa vandann enda eigi hann rætur í mismunandi framleiðni ólíkra hagkerfa með mismunandi launastig. Evrukreppan eigi sér kerfislægar rætur sem fjármálabandalag taki ekki á.

Kanadíska umræðuþáttinn má sjá hér.

• 2 blogg um fréttina

Bloggað um fréttina

• Vinstrivaktin gegn ESB: Mun ESB asni klyfjaður gulli brjóta niður andstöðu þjóðarinnar?
• Haraldur Haraldsson: Annað Lehman Brothers-hrun á leiðinni?/ekki skemtileg hugvekja þetta???