Erlent | mbl | 21.8.2012 | 7:42 | Uppfært 22.8.2012 0:07

„Diplómatískt sjálfsmorð“ fyrir Bretland

Julian Assange ávarpar stuðningsmenn sína af svölum ekvadorska sendiráðsins í London. AFP

Það væri diplómatískt sjálfsmorð af hálfu Breta ef þeir ætluðu sér að brjótast inn í sendiráð Ekvadors í London til að taka Julian Assange höndum. Þetta segir forseti Ekvadors, Rafael Correa.

Correa segir að með slíkri framkomu myndu Bretar opna á það að friðhelgi þeirra eigin sendiráða um allan heim yrði hundsuð. Forsetinn kom fram í ríkissjónvarpi Ekvadors í gærkvöldi og svaraði þar spurningum um deilurnar sem standa um Assange, stofnanda Wikileaks, sem hefur verið veitt hæli í Ekvador en situr fastur í sendiráði þeirra í London.

Aðspurður hvort hann teldi hugsanlegt að bresk yfirvöld myndu ráðast inn í sendiráðið til að handtaka Assange svaraði Correa að á meðan Bretar hefðu hvorki séð að sér né beðist afsökunar væri sú hætta fyrir hendi. Ekki kom fram í viðtalinu hvernig forsetinn sér fyrir sér næstu skref í átt að því að flytja Assange úr sendiráðinu, en hann sagðist reiðubúinn, ef þörf krefði, að leita til Sameinuðu þjóðanna.

Samtök Ameríkuríkja munu funda á föstudag og sagðist Correa vongóður um stuðning þar. „Munið að Davíð sigraði Golíat, og ef Davíðarnir eru margir þá er auðveldara að fella Golíat,“ sagði Correa og bætti við: „Bretarnir segjast ekki hafa um neitt annað að velja en að framselja hann, en af hverju framseldu þeir ekki Augusto Pinochet?“