Færri en 100 eldri þorskar í Norðursjó

Rannsókn á veiðifeng í evrópskum höfnum hefur sýnt að enginn af þeim þorskum sem veiddist í Norðursjó var eldri en 13 ára gamall. Þessar niðurstöður valda vísindamönnum áhyggjum af framtíð þorskstofnsins þar. Þetta segir í frétt The Telegraph um málið. 

Callum Roberts, prófessor í sjávarlíffræði við Háskólann í York, sagði að ofveiði þýddi að fæstir fiskar næðu meira en fjögurra ára aldri, en þá verður þorskurinn kynþroska.  „Það þýðir að það eru færri hrogn og lirfur til þess að viðhalda stofninum.“

Segir í fréttinni að í Norðursjó séu nú um 65.300 tonn af þorski yfir þriggja ára aldri, en að árið 1971 hafi þorskmagnið verið um 276.000 tonn. Chris Darby, yfirmaður einnar rannsóknarstofunnar, sagði: „Nýjustu áætlanir okkar gefa til kynna að árið 2011 hafi verið um 600 þorskar á aldrinum 12 til 13 ára í Norðursjó, og að um 200 þeirra hafi verið veiddir.“

Bætti Darby við að enginn þeirra þorska sem veiddist hefði verið eldri en 13 ára. Greining á þeim gögnum benti því til þess að færri en 100 eldri þorskar væru í öllum Norðursjó. Vísindamennirnir hafa því beðið um að þorskkvótinn í Norðursjó verði lækkaður úr 32.000 tonnum niður í 25.600 tonn. 

• 2 blogg um fréttina

Bloggað um fréttina

• Samtök um rannsóknir á ESB ...: Eina trygging eldri þorska er sjávarlögsaga Íslendinga
• Haraldur Haraldsson: Færri en 100 eldri þorskar í Norðursjó///Uppörfandi að ganga í …