Tyrkir gera árásir á sýrlensk skotmörk

Tyrkir hafa hafið árásir á sýrlensk skotmörk á ný eftir að tvær konur og þrjú börn létust eftir að hafa orðið fyrir sprengikúlum sem var skotið frá Sýrlandi í gær.

Nokkrir sýrlenskir hermenn féllu í skotárásum tyrkneska hersins. Þetta kemur fram á vef breska ríkisútvarpsins sem hefur upplýsingar eftir sýrlenskum aðgerðahópi.

Stjórnvöld í Sýrlandi segjast vera að rannsaka árásina sem var gerð á tyrkneska bæinn Akcakele sem er við landamæri ríkjanna.

Fram kemur á vef BBC, að tyrkneska þingið ræði nú hvort flytja eigi hermenn yfir landamærin til Sýrlands. Haft er eftir heimildarmönnum innan tyrknesku ríkisstjórnarinnar að Tyrkir hafi ekki í hyggju að lýsa yfir stríði gegn Sýrlandi.

Haft er eftir embættismanni að sýrlensk yfirvöld eigi að líta á árásirnar, sem hófust í gær, sem viðvörun.

Öryggisráð Sameinuðu þjóðanna mun koma saman í dag, en Tyrkir hafa óskað eftir því að ráðið grípi til viðeigandi aðgerða til að stöðva árásir sýrlenska stjórnarhersins.

Ógnar öryggi og friði í heiminum

Frönsk stjórnvöld sögðu í dag að árás sýrlenska hersins á Tyrkland í gær ógni öryggi og friði í heiminum. Þau krefjast þess að árásunum verði hætt þegar í stað.

Laurent Fabius, utanríkisráðherra Frakklands, segir í yfirlýsingu að árásin hafi brotið gegn alþjóðalögum og ógni öryggi heimsins og friði með alvarlegum hætti.

„Alþjóðasamfélagið getur ekki sætt sig við það að sýrlensk stjórnvöld haldi áfram slíkum ofbeldisverkum í sínu eigin landi og út fyrir landamæri sín,“ segir ráðherrann.

Tyrkneski herinn er við öllu búinn. AFP

• 1 blogg um fréttina

Bloggað um fréttina

• Guðjón Sigþór Jensson: Hryllingurinn magnast í Austurlöndum nær