Hótaði einnig að myrða Obama

Quazi Mohammad Rezwanul Ahsan Nafis,  sem er í haldi lögreglu í New York vegna sprengjutilræðis við Seðlabanka Bandaríkjanna, hótaði einnig að myrða Barack Obama, Bandaríkjaforseta. Þetta segir bandaríska fréttastofan ABC. Nafis var leiddur fyrir dómara í kvöld og úrskurðaður í gæsluvarðhald.

Nafis sem er 21 árs og frá Bangladesh verður að öllum líkindum kærður fyrir að tilraun til notkunar þungavopna og fyrir tengsl sín við hryðjuverkasamtökin al-Qaeda. Nafis var handtekinn þegar hann reyndi að sprengja fimm hundruð kílóa sprengju sem hann hafði komið fyrir í sendibifreið við útibú Seðlabanka Bandaríkjanna í New York.

Hann var í fjarlægð við bílinn og var kveikibúnaður sprengjunnar stilltur þannig að hægt væri að virkja hann með farsíma. Eins og komið hefur fram var þó aldrei hætta á ferðum þar sem aldrei var um sprengju að ræða.

Í dómskjölum kemur fram að Nafis hafi komið til Bandaríkjanna í janúar til að fremja hryðjuverk. Hann hafi leitað að samverkamönnum á netinu og hitti einn í sumar sem hann taldi að væri á sínu bandi en var í raun útsendari bandarísku alríkislögreglunnar. 

Nafis lýsti yfir áhuga sínum á að sprengja Seðlabanka Bandaríkjanna og hóf hann ásamt útsendaranum að skipuleggja verknaðinn. Útsendarinn útvegaði svo „sprengiefnin“ en Nafis kveikibúnaðinn.

Eftir að hafa lagt sendibílnum fór Nafis á nærliggjandi hótel þar sem hann tók upp myndband, játaði verknaðinn og hugðist virkja sprengjuna með farsíma sínum en án árangurs. Þá ruddust lögreglumenn inn og handtóku hann.