Nauðgaði 11 ára stúlku

Lundúnalögreglan hefur handtekið 26 ára karlmann grunaðan um að hafa nauðgað 11 ára stúlku. Stúlkan var leið heim úr skólanum á föstudag er ráðist var á hana.

Hún var nýkomin út úr skólabílnum í grennd við heimili sitt í Edmonton í norðurhluta London, er hún var gripin og dregin inn í almenningsgarð þar sem hún var beitt kynferðisofbeldi, að því er fram kemur í frétt The Telegraph.

Rannsóknarlögreglumenn segja að árásin hafi hugsanlega staðið yfir í allt að þrjár klukkustundir og þurfti stúlkan að gangast undir skurðaðgerð á sjúkrahúsi.

Lögreglan segir að í morgun hafi 26 ára karlmaður verið handtekinn í húsi í Edmonton. Er hann grunaður um nauðgunina og er nú yfirheyrður.

Enn leitar þó lögreglan vitna að árásinni.

Lögreglumaðurinn Simon Ellershaw sem fer fyrir rannsókninni segir að árásin hafi verið mjög grimmileg og fórnarlambið varnarlaust barn.

Hann segir að stúlkan hafi farið heim með skólabílnum kl. 4 síðdegis á föstudag og farið út úr honum skammt frá heimili sínu. Hún hafi gengið fram hjá Jubilee-garðinum og þar hafi hún verið gripin og dregin inn í garðinn þar sem henni var svo nauðgað.

 Ellershaw segir: „Þetta var hrikaleg og óvenjuleg árás á varnarlausa skólastúlku sem var á leið heim úr skólanum.“

Rannsókninni er stýrt af kynferðisbrotadeild Scotland Yard.

• 1 blogg um fréttina

Bloggað um fréttina

• Bjarni Tryggvason: Ótrúlega sjúkt eins og allt barnaníð er.