Monti ætlar að segja af sér

Forsætisráðherra Ítalíu, Mario Monti, hyggst segja af sér embætti samkvæmt frétt AFP aðeins nokkrum klukkustundum eftir að forveri hans í embætti, Silvio Berlusconi, tilkynnti að hann ætlaði að sækjast aftur eftir embættinu.

Fram kemur í tilkynningu frá skrifstofu Giorgios Napolitano, forseta Ítalíu, samkvæmt fréttinni að Monti telji sér ekki fært að halda áfram störfum ríkisstjórnar sinnar og hafi af þeim sökum komið því á framfæri að hann ætlaði að leggja fram afsögn sína.

Þá segir að ákvörðun Montis komi í kjölfar fundar sem hann átti með forseta Ítalíu og funda með forystumönnum stjórnmálaflokka á ítalska þinginu í gær. Ætlun hans sé að tryggja að fjárlög næsta árs verði samþykkt en segja síðan af sér.

Ennfremur kemur fram í frétt AFP að forysta flokks Berlusconis hafi gefið yfirlýsingar sem túlkaðar hafi verið sem vantraust á ríkisstjórn Montis.

Hins vegar hafi Monti áður tekið ákvörðun um að hætta sem forsætisráðherra að loknum þingkosningum sem gert hafi verið ráð fyrir að færu fram í mars eða apríl. Monti hefur verið forsætisráðherra Ítalíu síðan í nóvember 2011.

• 1 blogg um fréttina

Bloggað um fréttina

• Ómar Geirsson: Er hérahjarta í komminsara Evrópusambandsins???