Obama sór embættiseið

Barack Obama sór embættiseið sem forseti Bandaríkjanna með formlegum hætti í dag. Athöfnin fór fram í Hvíta húsinu í dag og var látlaus.

Samkvæmt stjórnarskrá Bandaríkjanna skal forseti sverja embættiseið á hádegi 20. janúar. Þar sem 20. janúar bar upp á sunnudag mun forsetinn aftur sverja embættiseið fyrir framan landsmenn við hátíðlega innsetningarathöfn á morgun. Þá verður meira um dýrðir.

John Roberts, forseti hæstaréttar, stýrði athöfninni. Michelle Obama forsetafrú og dæturnar Sasha og Malia voru vottar auk annarra fjölskyldumeðlima og fréttamanna.

Forsetinn lagði hönd á biblíu, sem tilheyrir fjölskyldu Michelle Obama, og hét því að varðveita og vernda stjórnarskrá Bandaríkjanna.

Hann mun endurtaka þessi orð við athöfnina á morgun og þá mun hann greina frá stefnu sinni næstu fjögur árin.