Berlusconi hyllir Mussolini

Silvio Berlusconi finnur sífellt nýjar leiðir til að vekja hneykslun en nýleg ummæli forsætisráðherrans fyrrverandi hafa vakið mikla reiði í heimalandi hans og víða um heim. 

Lét Berlusconi þau orð falla á minningarathöfn um helförina sem fram fór í Mílanó í dag, að einræðisherrann Benito Mussolini hafi „unnið ýmis afrek“ í stjórnartíð sinni í því skyni að bæta fyrir „verstu mistök sín“, gyðingaofsóknir og að hafa heimilað flutning á mörg þúsund gyðingum til Auschwitz

„Kynþáttalöggjöfin voru verstu mistök leiðtogans Mussolinis, sem vann engu að síður mikil afrek á mörgum öðrum sviðum,“ sagði Berlusconi sem hefur uppi áform um endurkomu í stjórnmál. Talið er víst að hann muni bjóða sig fram í næstu þingkosningum á Ítalíu, sem fram fara í næsta mánuði.

„Ítalía hefur ekki sömu skyldum að gegna og Þýskaland,“ bætti Berlusconi við og vísaði með því til ummæla Angelu Merkel fyrr í vikunni þegar hún sagði að Þýskaland „gegndi eilífu ábyrgðarhlutverki vegna voðaverka nasista.“

Skrípamynd af Mussolini

Ummæli Berlusconis hafa ekki síst vakið reiði meðal stjórnmálamanna á vinstri vængnum á Ítalíu. „Orð Berlusconis eru svívirða og móðgun við söguna og minningu um fórnarlömb helfararinnar. Hann skuldar ítölsku þjóðinni afsökunarbeiðni,“ sagði Dario Francheschini, formaður lýðræðisflokksins á Ítalíu. Skoðanakannanir fyrir þingkosningarnar sýna að Francheschini nýtur mest fylgis allra þingmanna þar í landi.

„Það er einfaldlega ógeðslegt að á minningardegi um helförina skuli Berlusconi leyfa sér að leggja til endurreisn stjórnarhátta Mussolinis, einræðisherrans sem dró Ítalíu í seinni heimsstyrjöldina,“ sagði þingkonan Debora Serracchiani í yfirlýsingu. 

„Berlusconi ber sem eigandi fjölmiðlaveldis og fyrrum stjórnmálamaður gríðarlega ábyrgð, bæði siðferðis- og málefnalega, sem hann bregst ítrekað,“ bætti Serracchiani við. 

Antonio Di Petro, formaður flokks sem berst gegn spillingu á Ítalíu sagði að Berlusconi væri „sjálfur ekkert annað en skrípamynd af Mussolini“.

Ljóst er að ummælin bætast í umfangsmikið safn hneykslismála í fortíð Berlusconis, en hann gegndi embætti forsætisráðherra í þrjú kjörtímabil. Hann er formaður Frelsisflokksins og er eins og áður segir búist við að hann muni gefa kost á sér í næstu kosningum. Ekki er þó vitað hvort hann muni falast eftir forsætisráðherrastólnum á ný eða þiggja stöðu í ráðuneyti, fari svo að flokkur hans sigri.  

• 3 blogg um fréttina

Bloggað um fréttina

• Ómar Ragnarsson: Gat látið járnbrautalestirnar ganga á áætlun.
• Sigurður Haraldsson: Berlusconi.
• Ásgrímur Hartmannsson: Hann ætlar bara að vera á undan kúrvunni