Erlent | AFP | 5.2.2013 | 7:55 | Uppfært 8:14

Kvenhermenn tilbúnir í slaginn

Sú ákvörðun bandarískra stjórnvalda að leyfa konum í hernum formlega að starfa á víglínunni markar tímamót í áratuga baráttu kvenhermanna. Frá árinu 2003 hafa yfir 150 bandarískar konur fallið í bardögum í Írak og Afganistan.

Lisa Jones er uppgjafarhermaður og á að baki 26 ára feril með Bandaríkjaher. Hún starfaði m.a. í Afganistan og bar titilinn ráðgjafi, en þótt hún hafi aldrei formlega talist vera á víglínunni var hún 7 sinnum í bílalest sem varð fyrir skotárás.

„Þetta er löngu tímabært. Það er ánægjulegt að vita að við fáu fái nú viðurkenningu fyrir störfin sem þær vinna í hernum," segir Jones.

Í Virginiu er að finna US Army Women's Museum og að sögn forstöðukonu safnsins er markmiðið að kynna fyrir almenningi þær miklu fórnir sem konur hafa fært í hernum undanfarin 10 ár. Frá árinu 2003 hafa yfir 150 kvenhermenn fallið í Írak og Afganistan og konur eru nú um 15% bandarískra hermanna.

Það er mikil breyting frá 9. áratugnum, þegar Patricia Siegel vann sem ráðgjafi hershöfðingja í West Point herstöðinni og leiðbeindi þeim um hvernig opna mætti herinn fyrir konum. Hún segir að ákvörðun Pentagon um að hleypa konum á víglínuna muni aðeins virka til fulls ef æðstu yfirmenn hersins styðja hana.

Bandaríkjaher hefur frest til ársins 2016 til að ákveða hvaða stöður, ef einhverjar, verði áfram lokaðar konum.