Hetjan sem varðist spillingunni

Víetnamskur bóndi sem varð þjóðhetja er hann notaði heimatilbúin vopn til að verjast því að vera borinn út, kom fyrir dómstól í dag. Fjöldi fólks kom saman við dómshúsið til að sýna manninum stuðning og vekja athygli á réttindum landeigenda.

Að minnsta kosti þrír þekktir mótmælendur voru handteknir fyrir utan dómshúsið í Hai Phong.

 Doan Van Vuon ætlaði ekki að láta fyrirskipun um útburð yfir sig ganga og tók til varna fyrir sig og fjölskyldu sína.

Í dómsskjölum kemur fram að sjö lögreglumenn hafi særst í janúar í fyrra í átökum við bóndann sem beitti m.a. heimatilbúnum skotvopnum. Lögreglunni hafði verið fyrirskipað að bera bóndann, sem stundar fiskirækt, út af jörð sinni í Tien Lang-sýslu, um 90 km austur af Hanoi.

Málið vakti gríðarlega athygli og varð m.a. til þess að forsætisráðherra landsins lýsti því yfir að útburðurinn hafi verið ólöglegur og að hann ætlaði að berjast gegn spillingu stjórnvalda á landsbyggðinni.

Vuon var þó ákærður fyrir tilraun til manndráps ásamt þremur öðrum meðlimum fjölskyldu sinnar. Þeir hafa allir verið í haldi frá því að átökin áttu sér stað fyrir rúmu ári.

Verði þeir fundnir sekir gætu þeir átt dauðarefsingu yfir höfði sér.

• 1 blogg um fréttina

Bloggað um fréttina

• Bjarni Tryggvason: Ísland á sama spillingar stigi og Víetnam.